న్యూఢిల్లీ, ట్రైనెట్ న్యూస్, అక్టోబర్ 13:
ఎలక్ట్రానిక్‌ వ్యర్థాలను బాధ్యతాయుతంగా సేకరించి, రీసైక్లింగ్‌కు తరలించేందుకు మహానది కోల్‌ఫీల్డ్స్‌ లిమిటెడ్‌ (ఎంసీఎల్‌) ప్రత్యేక చర్యలు చేపట్టింది. దేశవ్యాప్తంగా నిర్వహిస్తున్న స్పెషల్‌ క్యాంపెయిన్‌ 6లో భాగంగా సంస్థ ప్రధాన కార్యాలయంతోపాటు కార్యకలాపాలు నిర్వహించే అన్ని ప్రాంతాల్లో ఈ–వ్యర్థాల నిర్వహణ, పరిశుభ్రత, పర్యావరణ అవగాహన కార్యక్రమాలను అమలు చేస్తోంది. ఈ కార్యక్రమం అక్టోబర్ 31 వరకు కొనసాగనుంది.
నిరుపయోగంగా మారిన ఎలక్ట్రానిక్‌ వస్తువుల సేకరణకు సంస్థ పరిధిలోని వివిధ ప్రాంతాల్లో ప్రత్యేక కియోస్క్‌లు ఏర్పాటు చేశారు. సేకరించిన వ్యర్థాలను అధీకృత రీసైక్లింగ్‌ సంస్థల ద్వారా శాస్త్రీయ పద్ధతుల్లో నిర్వహించేందుకు చర్యలు తీసుకుంటున్నారు. ప్రధాన కార్యాలయం, ఇతర కార్యక్షేత్రాల్లోని ఉద్యోగులు ఈ కార్యక్రమాల్లో ఉత్సాహంగా పాల్గొంటున్నారు.
ఈ–వ్యర్థాలను సక్రమంగా పారవేయకపోతే నేల, నీరు కలుషితమవడంతోపాటు మానవ ఆరోగ్యం, పర్యావరణానికి హాని కలుగుతుందనే అంశాలపై ఉద్యోగులు, సమీప సమాజాలకు అవగాహన కల్పిస్తున్నారు.
కార్యక్రమం అమలు తొలి వారంలో గుర్తించిన 240 ప్రదేశాల్లో 73 ప్రదేశాలను శుభ్రపరిచారు. మొత్తం 10 లక్షల చదరపు అడుగుల విస్తీర్ణాన్ని శుభ్రపరచాలనే లక్ష్యానికి గాను 3,06,663 చదరపు అడుగుల్లో పరిశుభ్రత పనులు పూర్తయ్యాయి. అలాగే 600 మెట్రిక్‌ టన్నుల స్క్రాప్‌ను తొలగించాలని లక్ష్యంగా పెట్టుకున్నారు. భారీ గనుల యంత్రాలకు సంబంధించిన 350 బ్యాటరీలను స్క్రాప్‌గా విక్రయించడం ద్వారా ఆదాయం సమకూరింది.
కార్యాలయ పరిశుభ్రత, పర్యావరణ పరిరక్షణ, బాధ్యతాయుత ఈ–వ్యర్థాల నిర్వహణకు సంస్థ కట్టుబడి ఉందని ఎంసీఎల్‌ తెలిపింది. వనరులను సమర్థంగా వినియోగిస్తూ పరిశుభ్రమైన, సుస్థిర భవిష్యత్తు సాధించేందుకు ఈ కార్యక్రమం తోడ్పడుతుందని పేర్కొంది.
