నల్లగొండ జిల్లా ఇన్‌చార్జ్: విశ్వనాథ్
హాలియా: రాజన్న సిరిసిల్ల జిల్లా వేములవాడలో ఈ నెల 26 నుంచి 29 వరకు జరగనున్న సబ్ జూనియర్ అంతర్ జిల్లాల రాష్ట్రస్థాయి కబడ్డీ పోటీలకు హాజరుకానున్న నల్లగొండ జిల్లా బాలికల జట్టు శిక్షణ శిబిరాన్ని శ్రీ శ్లోకా గ్రూప్ ఆఫ్ స్కూల్స్ చైర్మన్ డాక్టర్ కుక్కడాల ఆంజనేయులు బుధవారం ఉదయం సందర్శించారు.
ఈ సందర్భంగా శిక్షణ శిబిరంలో ఉన్న క్రీడాకారులను అభినందించి శుభాకాంక్షలు తెలిపారు. వివిధ ప్రాంతాల నుంచి వచ్చి శిక్షణ పొందుతున్న క్రీడాకారులు ఈ శిబిరాన్ని సద్వినియోగం చేసుకుని తమ క్రీడా నైపుణ్యాలను మరింత పెంపొందించుకోవాలని సూచించారు.
క్రీడాకారులు క్రమశిక్షణతో ముందుకు సాగుతూ భవిష్యత్తులో ఉన్నత స్థాయికి ఎదిగి నల్లగొండ జిల్లాతో పాటు తెలంగాణ రాష్ట్రానికి, దేశానికి మంచి పేరు తీసుకురావాలని డాక్టర్ కుక్కడాల ఆంజనేయులు ఆకాంక్షించారు.
నల్లగొండ జిల్లా కబడ్డీ సంఘం ఆధ్వర్యంలో శిక్షణ శిబిరాన్ని శ్రీ శ్లోకా పాఠశాలలో నిర్వహిస్తున్నందుకు సంఘం అధ్యక్ష, కార్యదర్శులకు ఆయన కృతజ్ఞతలు తెలిపారు.
పేద క్రీడాకారులకు అవసరమైన సహాయ సహకారాలు అందించేందుకు తన వంతు కృషి చేస్తానని డాక్టర్ కుక్కడాల ఆంజనేయులు తెలిపారు. అలాగే ప్రతిభ కలిగిన క్రీడాకారులకు తమ విద్యాసంస్థల ద్వారా ఉచిత విద్య అందించేలా భవిష్యత్తులో కూడా కృషి చేస్తానని పేర్కొన్నారు.
ఈ కార్యక్రమంలో శ్రీ శ్లోకా పాఠశాల ప్రిన్సిపాల్ సాదియా, కబడ్డీ కోచ్ ఎం.డి. అన్వర్ ఖాన్ తదితరులు పాల్గొన్నారు.
