న్యూఢిల్లీ, ట్రైనెట్ న్యూస్, అక్టోబరు 10:
యువతలో ఆరోగ్యకరమైన జీవనశైలిని ప్రోత్సహిస్తూ, మాదకద్రవ్యాల రహిత భారత్ నిర్మాణమే లక్ష్యంగా వారణాసిలో అక్టోబరు 11న 94వ ‘ఫిట్ ఇండియా సండేస్ ఆన్ సైకిల్’ కార్యక్రమం నిర్వహించనున్నారు. ‘వికసిత్ భారత్ కోసం మాదకద్రవ్యాల రహిత యువత’ ఇతివృత్తంతో ఉదయం 6 గంటల నుంచి నమో ఘాట్‌ నుంచి సంపూర్ణానంద సంస్కృత విశ్వవిద్యాలయంలోని దీక్షా మండపం వరకు సైకిల్ ర్యాలీ జరగనుంది.
కేంద్ర యువజన వ్యవహారాలు, క్రీడలు, కార్మిక, ఉపాధి శాఖల మంత్రి డాక్టర్ మన్సుఖ్ మాండవీయ ముఖ్య అతిథిగా హాజరుకానున్నారు. యువత, క్రీడాభిమానులు, ఫిట్‌నెస్ ఔత్సాహికులు, ప్రజలతోపాటు 2026 ఐచి–నగోయా ఆసియా క్రీడల్లో పతకాలు సాధించిన భారత క్రీడాకారులు ఈ కార్యక్రమంలో పాల్గొననున్నారు.
మహిళల 400 మీటర్ల పరుగులో కాంస్యం సాధించిన ప్రాచీ చౌధరి, మహిళల 3000 మీటర్ల స్టీపుల్‌చేజ్‌, 5000 మీటర్ల పరుగులో రెండు కాంస్య పతకాలు గెలుచుకున్న పారుల్ చౌధరి ర్యాలీలో పాల్గొననున్నారు. మిక్స్‌డ్‌ 4×400 మీటర్ల రిలేలో రజతం, పురుషుల 4×400 మీటర్ల రిలేలో కాంస్యం సాధించిన జయ్ కుమార్, భారత హాకీ జట్టులో సభ్యుడిగా స్వర్ణ పతకం అందుకున్న రాజ్ కుమార్ పాల్ కూడా హాజరుకానున్నారు. వీరి భాగస్వామ్యం యువతకు క్రమశిక్షణ, పట్టుదల, నిత్య సాధన ప్రాధాన్యాన్ని తెలియజేయనుంది.
నమో ఘాట్‌లో యోగా, జుంబా, సరదా ఆటలు, ఇతర భాగస్వామ్య కార్యక్రమాలను ఏర్పాటు చేయనున్నారు. సైక్లింగ్, నడక, శారీరక వ్యాయామాన్ని రోజువారీ జీవితంలో భాగం చేసుకోవాలని ఈ కార్యక్రమం ద్వారా ప్రజలకు పిలుపునివ్వనున్నారు. మాదకద్రవ్యాల వినియోగాన్ని నిరోధించడంలో కుటుంబాలు, విద్యాసంస్థలు, సమాజం, క్రీడాకారుల సమష్టి భాగస్వామ్యాన్ని ప్రోత్సహించనున్నారు.
కేంద్ర యువజన వ్యవహారాలు, క్రీడల మంత్రిత్వ శాఖ ఆధ్వర్యంలో భారత సైక్లింగ్ సమాఖ్య, రాహ్‌గిరి ఫౌండేషన్‌, ‘మై భారత్’ సహకారంతో ఈ కార్యక్రమం జరుగుతోంది. దేశంలోని అన్ని రాష్ట్రాలు, కేంద్రపాలిత ప్రాంతాల్లో భారత క్రీడా ప్రాధికార సంస్థ కేంద్రాలు, ఖేలో ఇండియా కేంద్రాల్లోనూ సైక్లింగ్ కార్యక్రమాలు ఏకకాలంలో నిర్వహిస్తున్నారు. దేశవ్యాప్తంగా 6 వేలకు పైగా నమో ఫిట్ ఇండియా క్లబ్‌లు ప్రతి వారం ఈ ఉద్యమంలో భాగస్వామ్యమవుతున్నాయి.
