గాంధీజీ జీవితం ప్రపంచానికే ఆదర్శం
ఘనంగా మహాత్మా గాంధీ జయంతి వేడుకలు
హైదరాబాద్, అక్టోబర్‌ 2 (ట్రైనెట్ న్యూస్‌): భారత స్వాతంత్ర్య ఉద్యమానికి నాయకత్వం వహించి, అహింసా మార్గంలో దేశానికి స్వేచ్ఛను అందించిన జాతిపిత మహాత్మా గాంధీ జీవితం ప్రపంచానికే ఆదర్శమని పలువురు వక్తలు పేర్కొన్నారు. మహాత్మా గాంధీ జయంతిని పురస్కరించుకొని శ్రీ త్యాగరాయ గానసభ, తెలంగాణ రాష్ట్ర భాషా సాంస్కృతిక శాఖ సంయుక్త ఆధ్వర్యంలో గురువారం గానసభలోని కళావేదికలో ప్రత్యేక కార్యక్రమాన్ని నిర్వహించారు.
‘ఎందరో మహానుభావులు–మధుర స్మృతులు’ కార్యక్రమంలో భాగంగా నిర్వహించిన ఈ సభకు ప్రముఖ సాహితీవేత్త, తెలంగాణ రచయితల సంఘం అధ్యక్షుడు ఆచార్య నాళేశ్వరం శంకరం ముఖ్య అతిథిగా హాజరయ్యారు. శ్రీ త్యాగరాయ గానసభ అధ్యక్షుడు కళా వి.ఎస్‌. జనార్దనమూర్తి సభకు అధ్యక్షత వహించారు.
స్వర కేసరి శ్రీనాథరావు, గాయకుడు డి.ఎం.వి. సుబ్బారావు విశిష్ట అతిథులుగా, గానసభ పాలకమండలి సభ్యుడు బండి శ్రీనివాస్‌ ఆత్మీయ అతిథిగా పాల్గొన్నారు. ఈ సందర్భంగా గాంధీజీ చిత్రపటానికి పూలమాలలు వేసి ఘనంగా నివాళులర్పించారు.
అహింస, సత్యాగ్రహం, శాంతి, సామరస్యం వంటి గాంధీజీ సిద్ధాంతాలు నేటి సమాజానికి ఎంతో అవసరమని వక్తలు తెలిపారు. యువత మహాత్ముడి ఆశయాలను ఆదర్శంగా తీసుకొని దేశాభివృద్ధిలో భాగస్వాములు కావాలని పిలుపునిచ్చారు. అనంతరం గాంధీజీకి ఇష్టమైన గీతాలు, దేశభక్తి గేయాలతో నిర్వహించిన సంగీత కార్యక్రమం ప్రేక్షకులను ఆకట్టుకుంది.
